Cî tse escu armân? La ahtari antribari putem s-dăm unî njii
di apândâseri.
Cî azburăscu armâneashti, shi înji ari hari, poati s-dzâcî
cariva. Cî li shtiu adetsli a noasti, poati s-dzâcî altu cariva. Cî negu tu
bâsearicî la preftsâi cari adghivâsescu
pi armâneashti. Cî andrupăscu cu pâradz iventuri culturali armâneshtsî.
Cî-nji anvetsu cilimeanjii s-azburascî armâneashti. Cî adar voluntariat ti armânami.
Unî apandisi cari înji si pari mult mushatî, iasti: Cî tu a mea bibliotecă am multi cârtsî ti
armâni, ori angrâpsiti di armâni, ori angrâpsiti pi armâneashti. Shi nu
shedu anvâliti tu pulbiri, ama cariva li
adghivâseashti.
Vâ spun andreptu cî mini
nu am anacri s-dau aiestî apandisi nica, ama acâtsai niheam di-nheam s-adun
ahtari cârtsî. Unî dit iali iasti Pirmithi ti Armânamea di Iutsido, unî Antoloyii minduitî di Mihai Sima, cu
agiutorlu la pareia: Alexandru Gica, Ianula Gheorghe, Mariana Bara. Cartea fu
cundiljatî di Monica Gica shi tipusitî Bucureshti tu anlu 2008 la Editura Palimpsest. Minduiescu cî tuts armânji lipseashti s-aibî ahtari
carti, maxus atsei tsi au cilimeanj.
Pirmitili apridusi pi armâneashti suntu: Papaclu urutecicu,
Unâsprî yearachini (Hans Christian
Andersen), Albă ca Neaua, Cinusharca, Livendul arăftic, Hansel cu Gretel
(Fratslji Grimm), Mushata câdzutî tu somnu (Charles Perrault).Tu cadri iasti Albă ca Neaua alâxitî tu stranji armâneshtsî shi Mushata câdzutî tu somnu.
Oarî bunî.
